ஆகஸ்ட் 23,2019 அன்று திருச்சியில் புதிய தேசியக் கல்விக் கொள்கையை முழுவதும் திரும்பப்பெற வலியுறுத்தி தமிழ்நாடு முற்போக்கு எழுத்தாளர் கலைஞர்கள் சங்கம் கல்வி உரிமை மாநாட்டினை நடத்தியது. மாநாட்டில் ஆசிரியர் நண்பர்கள் பலர் கலந்துக்கொண்டனர். ஆசிரியர்களின் பார்வையில் இந்த மாநாடு எப்படி இருந்தது என்பதையும் புதிய தேசியக் கல்விக் கொள்கையை முன்னிட்டு மாநாட்டில் பேசப்பட்ட விசயங்களை இங்கு தொகுத்துள்ளோம் .

தமுஎகச கல்வி உரிமை மாநாடு – கலகல வகுப்பறை சிவா 

தேசிய கல்விக் கொள்கை முன்வரைவை பலமுறை வாசித்திருந்தாலும் இந்த மாநாட்டில் உரையாற்றப்போகும்  பலரின் உரைகளை ஏற்கனவே கேட்டிருந்தாலும் கல்விக் கொள்கை வரைவு குறித்து ஒரு நாள் முழுவதும் பலரும் பேசுவதைக் கேட்கவும் மாநிலமெங்கும் இருந்து ஆர்வமுடன் பங்கேற்க வந்திருப்பவர்களுடன் உரையாடவும் ஒரு வாய்ப்பாக இருக்கும் என்ற ஆர்வத்துடன் கலந்து கொண்டேன். காலை முதல் மாலை வரை பல்வேறு பார்வைகளைக் கொண்ட ஏராளமான உரைகள், நூல் வெளியிடுகள், கலை நிகழ்வுகள் என்று விறுவிறுப்பான மாநாடு. தமுஎகச உறுப்பினர்கள், கல்வி ஆர்வலர்கள், இயக்கத் தோழர்கள் ஏராளமான ஆசிரியர்கள் குறிப்பாக மாணவர்கள் இம்மாநாட்டில் பங்கு கொண்டது முக்கியமானது.

தொடர்ந்து உரைகள், ஏராளமான செய்திகள், பல்வேறு பார்வைகள். குறிப்பாக மேனாள் துணைவேந்தர் ஜவகர் பேசியது ஒரு மாற்றுப் பார்வை. வெறுமனே கல்விக் கொள்கையை எதிர்க்காமல் இதற்கு மாற்றாக என்ன செய்யப்போகிறோம்? என்று கேள்வி அவரால் எழுப்பப்பட்டது. இது வெறும் கேள்வியாக நின்றுவிடாமல் இந்த சமூகம் சார்ந்த ஒரு கல்வி முறையை, கல்வித்திட்டத்தை முன்மொழிய வேண்டும். அதற்கான முயற்சிகளில் இருக்கிறேன் விரைவில் அதுவும் வெளியிடப்படும் என்று கூறினார்.

ஒடுக்கப்பட்ட மக்களின் கல்வி குறித்து இயக்குனர் ரஞ்சித் பேச்சு மற்றும் வா.கீதா பேசியது கல்விக் கொள்கையைத் தாண்டி சமூக நீதி குறித்ததாக இருந்தது.

 “இந்த அரங்கில் பேசப்படும் அனைத்து செய்திகளும் மக்கள் முன்னிலையில் சொல்லப்படவேண்டும். வீதிகளுக்குச் செல்லவேண்டும். கலைவடிவங்கள் மூலமாக கல்விக் கொள்கை, கல்வி சார்ந்த செய்திகள் மக்களிடம் கொண்டு சொல்லப்படவேண்டும். இதுகுறித்து  வீதி நாடகங்களை உருவாக்கினால் நானும் என்போன்ற கலைஞர்களும்  நடிக்கத் தயாராக இருக்கிறோம்”.என்று திரைக் கலைஞர் ரோகிணி பேசியதையே இந்த மாநாட்டின் செய்தியாகக் கொள்ளலாம்.

கல்விக் கொள்கை முன்வரைவு நிறைவேற்றப்படலாம். இப்போதே அதனுடைய கூறுகள் பலவும் செயல்வடிவம் பெற்றுவிட்டன. இனி நாம் என்ன செய்யப் போகிறோம்? கல்வி குறித்து மக்களிடம் பேசவேண்டும்,ஆசிரியர்கள் வகுப்பறைக்குள் செயல்படவேண்டும். அது ஒன்றே கல்வியில் மாற்றங்களை மலரச்செய்யும். தேசிய கல்வி கொள்கை வரைவு கல்வி குறித்த உரையாடல்களை உருவாக்கியிருக்கிறது.

திருச்சி கல்வி உரிமை மாநாடு – உமா (பள்ளிக் கல்விப் பாதுகாப்பு இயக்கம்)

இந்தியாவிலேயே வேறு எந்த மாநிலத்திலும் இல்லாத ஒரு எதிர்வினையாக இந்த தேசியக் கல்விக் கொள்கை வரைவை திரும்பப் பெறக் கூறி, வரைவுக் கொள்கையை எதிர்ப்பு தெரிவித்து இந்த மாநாடு ஆகஸ்ட் 23 ஏறக்குறைய 13 மணி நேரம் தொடர்ந்து நடந்தது. ஓய்வு பெற்ற உச்ச நீதிமன்ற நீதிபதி உட்பட , அரசியல் தலைவர்கள் , கல்வியாள்கள் , பேராசிரியர்கள் , திரைத்துறை கலைஞர்கள் என பல பிரிவுகளிலிருந்தும் பல கோணங்களில் இவ் வரைவு அறிக்கை எந்த வகையில் சரியல்ல என்பதை வலுவாகப் பதிவு செய்தனர்.
விடுதலைக் கல்வி , ஒடுக்கு கல்வி , மறுக்கப்படும் சமூக நீதி , அரசியல் சட்டத்தை மறுக்கிறதா, கலைகளும் கல்வியும் , சமூக உரையாடலாகக் கல்வி , இருப்பதும் வருவதும் ,பழங்குடியினரின் உரிமை என்ன ஆகும் ?மாணவர் கண்ணோட்டத்தை மறுக்கும் வரைவறிக்கை , உயர் கல்வி இனி யாருக்கு ? , பள்ளிக் கல்விக்கு நேரும் பாதகங்கள் ,சிறுபான்மைக் கல்வி நிறுவனங்கள் எதிர்கொள்ளும் அபாயங்கள் ஆகிய தலைப்புகளில் கருத்துகள் பகிரப்பட்டன.

சில ஆயிரம் மக்கள் கலந்து கொண்ட நிகழ்வாக இது அமைந்தது. ஒரு ஆசிரியராக எனக்கு இக் கல்விக் கொள்கையில் தரப்பட்டுள்ள கனவுகளின் உறுதி மொழிகள் பிடித்திருந்தாலும் , அந்தக் கனவுகளை நிறைவேற்றுவதற்கான நிதியோ மற்ற பார்வைகளோ சிறு அளவும் இதில் இல்லை என்பதை இம் மாநாடு தெளிவுபடுத்தியது. தனியார்மயம் , மதவாதம் , அதிகாரமயம் என ஒற்றை அதிகாரக் குவிப்பில் எதிர் வரும் சமுதாயம் கல்வி பெறும் வாய்ப்புகளை இழந்து வெளியேற்றப்படுவர் என்பதை மாநாட்டு நிகழ்ச்சிகள் தெளிவாக விளக்கியது. அந்த வகையில் இந்த மாநாட்டை நடத்தி மக்களிடையே மிகப்பெரிய விழிப்புணர்வைத் தந்த தமுஎகசங்கத்திற்கு நாம் நன்றியைத் தெரிவிக்க வேண்டும்.